Tuesday, January 02, 2007

சிங்கள வான்படை மிலேச்சத்தனம்: 15 மக்கள் பலி.

இன்று செவ்வாய்க்கிழமை (02.01.2007) வன்னியில் மக்கள் குடியிருப்பு மீது சிறிலங்கா வான்படை தொடர்ச்சியாக பலதடவைகள் குண்டுவீச்சுத் தாக்குதலை மேற்கொண்டதில் ஒரு கிராமம் முற்றாக அழிக்கப்பட்டுள்ளது.

மன்னார் மாவட்டத்தின் இலுப்பக்கடவையிலிருக்கும் படகுத்துறை என்ற கடற்கரைக் கிராமமே தாக்குதலுக்குள்ளானது. இங்கிருந்த 25 வீடுகளில் 20 வீடுகள் முற்றாகத் தரைமட்டமாக்கப்பட்டுள்ளன. முதற்கட்டத் தகவலிப்படி 15 வரையானோர் கொல்லப்பட்டும், 30க்கும் அதிகமானோர் காயமடைந்துமுள்ளனர்.
மன்னாரிலிருந்து உதவிக்கு விரைந்த நோயாளர் காவுவண்டி சிங்களப் படையினரால் மறிக்கப்பட்டுள்ளது.

செய்தி: தமிழ்நெட்- 15 civilians killed, 30 wounded in aerial bombardment

இன்று கிளாலிக் கடற்பரப்பில் 50 தமிழர்கள் சிங்களக் கடற்படையால் வெறித்தனமாக சுட்டும் வெட்டியும் படுகொலை செய்யப்பட்டதன் பதினான்காம் ஆண்டு நினைவு நாளாகும்.

Friday, October 20, 2006

சிறிலங்கா கடற்படையின் 2 டோரா படகுகள் சேதம்

யாழ். வடமராட்சி நாகர்கோவில் கடற்சமரில் சிறிலங்கா கடற்படையின் 2 டோரா படகுகள் சேதமடைந்ததாக தமிழ்நெட் செய்தி வெளியிட்டுள்ளது.
தமிழ்நெட் வெளியிட்டுள்ள செய்தி விவரம்:


Two SLN Dvora vessels damaged in sea clash - LTTE
space
[Fri, 20 Oct 2006, 14:09 GMT]
Liberation Tigers officials in Kilinochchi said Sea Tigers retaliated a Sri Lanka Navy flotilla that launched an attack on Tiger vessels in the seas off Tiger territory in Nagarkovil. Sea Tigers chased the SLN flotilla towards Kudathanai in North. Two Dvora Fast Attack Crafts were damaged in the confrontation, they said. Full story >>
line

Thursday, October 12, 2006

யாராவது கண்டீர்களா?

தங்கள் படையில் 78 பேரைக் காணவில்லையென்று சிறிலங்கா அரசாங்கம் அறிவித்துள்ளது.
யாராவது கண்டீர்களா?

நேற்றுப் புதன்கிழமை (11.10.2006) அன்று யாழ்ப்பாணத்தில் முன்னரங்கப்பகுதியிலிருந்து ஆனையிறவைக் கைப்பற்றும் நோக்கோடு பலமுனைகளில் முன்னேறிய சிறிலங்கா அரசபடையிரை எதிர்த்துப் புலிகள் முறியடிப்புத் தாக்குதலைச் செய்தனர்.
சில பகுதிகளில் அவர்களை முன்னேறவிட்டு பின் தாக்கியழித்தனர். இம்முறியடிப்புத் தாக்குதலில் நூற்றுக்கணக்கான இராணுவத்தினர் கொல்லப்பட்டதோது பெருமளவு இராணுவத்தினர் காயமடைந்தனர்.
தாக்குதலில் ஈடுபடுத்தப்பட்ட டாங்கிகள் உட்பட கவசப்படை நிர்மூலமாக்கப்பட்டது.
பலத்த இழப்புக்களுடன் இராணுவத்தினர் தமது நிலைகளுக்குத் தப்பியோடினர்.

புலிகள் தரப்பிலிருந்து இராணுவத்தினரின் இழப்புக்குறித்து எண்ணிக்கைத் தகவல்கள் எவையும் வெளிவரவில்லையாயினும் புலிகள் சார்பான ஊடகங்கள் 200 வரையான படையினர் கொல்லப்பட்டனர் என்று தகவல் வெளியிட்டன.

புலிகள், தாங்கள் பெருமளவான இராணுவத்தினரது சடலங்களைக் கைப்பற்றியதாகவும் அவற்றை செஞ்சிலுவைச் சங்கம் ஊடாகக் கையளிக்க உள்ளதாகவும் அறிவித்திருந்தனர்.
இந்நிலையில் அரசதரப்போ தமது தரப்பில் 22 பேர் கொல்லப்பட்டனர், நூற்றுச்சொச்சம் பேர் காயமடைந்தனர் என்று இன்று காலைவரை சொல்லிக்கொண்டிருந்தது. பின் இறப்புத் தொகை 43 ஆக உயர்ந்திருந்தது.
ஆனால் இப்போது கதை மாறத் தொடங்கியுள்ளது.
இறுதியா அரசு வெளியிட்ட தகவலின்படி 55 இராணுவத்தினர் கொல்லப்பட்டனர் என்றும் 283 படையினர் காயமடைந்தனர் என்றும் சொல்லியதோடு புதிதான தகவலையும் வெளியிட்டுள்ளது.
அதாவது தங்களில் 78 படையினர் இத்தாக்குதலில் காணாமற் போயுள்ளதாக புதிதாக ஒரு தகவலை வெளியிட்டுள்ளது.
புலிகள் இன்றுமாலை 74 இராணுவத்தினரது சடலங்களை செஞ்சிலுவைச் சங்கத்த்திடம் கையளித்த நிலையில் இத்தகவலை வெளியிட்டுள்ளது.
முன்பென்றால் சடலங்களைக் கையேற்காமல் விட்டிருக்கும். ஆனால் இப்போது உண்மைநிலைகள் உடனுக்குடன் வெளித்தெரிந்து விடுகிறது. இன்று கிட்டத்தட்ட எல்லா சர்வதேச செய்தித்தாபனங்களும் படைத்தரப்பின் மோசமான இழப்புக்களை வெளிக்கொணர்ந்துள்ளன. சிங்களதேசத்துக்குத் துதிபாடும் சில தளங்கள் மட்டும் தமது ஆழ்ந்த கவலையை வெளியிட்டுள்ளன.

சமர் நடந்த இடத்தில் காணாமற் போதல் என்பது பெரும்பாலும் சாத்தியமற்றது. அது காட்டுப்பகுதியன்று. அத்தோடு பெரிய பிரதேசமுமுன்று. வெறும் 7 கிலோமீற்றர்களை மட்டும் முன்னரங்காகக் கொண்ட வெட்டைப் பகுதி. இதற்குள் ஒரு கொம்பனி இராணுவத்தினர் காணாமற் போயுள்ளதாகச் சொல்வது எப்படி?

ஆக படைத்தரப்பு ஒத்துக்கொண்டபடி பார்த்தாற்கூட ஆகக்குறைந்தபட்சம் நூற்றுமுப்பது படையினர் கொல்லப்பட்டுள்ளனர். ஆனால் ஓரளவு விவரம் புரிந்தவர்கள் கூட்டிக்கழித்துப் பார்த்து நிலைமையை விளங்கலாம். காயமடைந்த இராணுவத்தினர் தொகையும் இராணுவத்தரப்பு சொல்லியுள்ளதை விட அதிகமாகவே இருக்கும். கொழும்பில் வாழும் சிலரின் தகவலின்படி நேற்று மாலையிலிருந்து இரவுவரை விரைந்த நோயாளர் காவு வண்டிகளின் எண்ணிக்கையைக் கருத்திற்கொண்டால் நிலைமை இன்னும் மோசம்தான்.

ஒருபுறம் சமாதானத்துக்குத் தேதி குறித்துக்கொண்டு இன்னொருபுறம், அந்தத் தேதிக்குள் ஆனையிறவைப் பிடிப்பதென்று இன்னொரு தேதிகுறித்து, திட்டம் போட்டுக்கொண்டு சிறிலங்கா அரசாங்கம் நாடகமாடுகிறது.
வடக்கில் மட்டுமன்றி கிழக்கிலும் பல்வேறு ஆக்கிரமிப்பு நடவடிக்கைகள். சில தினங்களின் முன் வாகரை ஆக்கிரமிப்பு முயற்சி புலிகளால் முறியடிக்கப்பட்டது. இன்று அம்பாறையில் பெருமெடுப்பில் ஆக்கிரமிப்பு நடவடிக்கையைச் செய்கிறது அரசபடை.

கடந்த சில வாரங்களாக யுத்தச் சமநிலையில் புலிகள் பெருமளவு வீழ்ச்சிகண்டிருந்ததாகத் தோன்றிய விம்பம் சற்றுக் கலையத் தொடங்கியுள்ளது. புலிகள் பின்னடைவைச் சந்தி்ததது உண்மைதான். புலிகள் நிபந்தனையற்ற பேச்சுக்கு ஒத்துக்கொண்டதுகூட சற்று தம்மை ஆசுவாசப்படுத்திக் கொள்ளத்தான் என்றே கொள்ளலாம்.
ஆனால் சிங்களதேசம் சொல்வதுபோல் படுமட்டமான நிலைக்குப் புலிகள் போய்விடவில்லை. தாங்களே உருவாக்கிய ஒரு பொய்மையை அவர்களே நம்பி, இன்று மாட்டுப்பட்டுப் போனார்கள்.

இத்துடன் சிங்களதேசம் நிறுத்தப்போவதில்லை. இன்னும் தொடர்ச்சியான நகர்வுகளைச் செய்யத்தான் போகிறது. ஏனெனில் தனியே இது இராணுவ வெற்றிகளோடு மட்டும் அல்லது இராணுவத்தினரோடு மட்டும் தொடர்புடையவையல்ல.

Monday, September 04, 2006

சம்பூர் படையினராற் கைப்பற்றப்பட்டது?

திருமலையின் கேந்திர முக்கியத்துவம் வாய்ந்த சம்பூர்ப் பகுதியைத் தாம் கைப்பற்றியுள்ளதாகச் சிங்களத் தரப்புக் கூறியுள்ளது.
நடைமுறையைப் பார்க்கும்போது உண்மையாயிருக்கலாமென்று தோன்றுகிறது. அப்பகுதியைக் கைவிடுவதென்று புலிகள் தீர்மானித்துவிட்டனரா? அல்லது உண்மையில் தாக்குதலை எதிர்கொள்ள முடியவில்லையா?
தாம் தொடரப்போகும் பாரிய தாக்குதலுக்கு ஓர் அங்கீகாரத்தைப் பெற இப்பின்னடைவா?

ஆனால் ஒன்று. தற்சமயம் சிங்களப்படையின் உளவுரண் நன்கு உயர்ந்துள்ளதென்பதை ஒத்துக்கொள்ள வேண்டும்.
சம்பூரைக் கைப்பற்றியிருந்தால் திருகோணமலைத் துறைமுகத்துக்கான நிரந்தர ஆபத்தைத் தற்காலிகமாகத் தள்ளிப்போட்டுள்ளது சிறிலங்காப் படை.

அதுசரி, இப்போது புலிகள் நிலமீட்பை நடத்தினாலும் புலிகளை பின்வாங்கச் சொல்லி சர்வதேசம் சொல்லுமா? (முன்பு மூதூரைக் கைப்பற்றியபோது சொன்னமாதிரி)
புலிகள்தான் ஒப்பந்தத்தை முறித்தார்கள் என்று பன்னாட்டுச் சமூகம் சொல்லுமா?

போகிற போக்கைப்பார்த்தால் இனியொரு சமாதானப் பேச்சுவார்த்தை என்ற பேச்சுக்கே இடமில்லைப்போலுள்ளது.

சம்பூரைக் கைப்பற்றிவிட்டுத்தான் இனி புலிகளுடன் பேச்சுவார்த்தை என்று சிங்களத்தரப்பு சொல்லியிருந்தது. இப்போது கைப்பற்றியபின் புலிகளைப் பேச்சுக்கு அழைப்பார்களா?
ஆனால் புலியின் பதில் அனைவருக்கும் தெளிவானதே.
யாழ்ப்பாணத்தை இழந்தபோதே புலி எதிர்நிலை எடுத்தது.

ஈழப்போராட்டத்தில் சம்பூர் இதுவரை இருந்ததைவிட அதிமுக்கியமான ஓரிடமாக வரலாற்றில் இடம்பெறப்போவது உறுதியாகிவிட்டது.

Saturday, August 12, 2006

புலிகளின் யாழ்ப்பாணச் சண்டைக்காட்சிகள்-வீடியோ

யாழ்ப்பாணத்தில் சில இடங்களில் புலிகள் நடத்திய தாக்குதலின் வீடியோத் தொகுப்பைப் பார்க்க கீழுள்ள இணைப்புக்குச் செல்லுங்கள்.
http://www.lankasri.tv/index2.html
இது தமிழீழத் தேசியத் தொலைக்காட்சி சேவையின் காட்சிகள்.

நன்றி: லங்காசிறி.

Friday, August 11, 2006

யாழ்ப்பாணத்தில் யுத்தம் தொடங்கியது.

இன்று (11.08.2006) பிற்பகல் யாழ்ப்பாண்த்திலிருந்து வன்னிநோக்கி பெருமெடுப்பில் படையினர் முன்னேற்ற முயற்சியை மேற்கொண்டனர். கடுமையான எறிகணைத்தாக்குதல்களுடன் இவர்கள் வன்னிநோக்கி தமது படைநடவடிக்கையைத் தொடர்ந்தனர். அதையெதிர்த்து புலிகள் கடுமையான எதிர்த்தாக்குதலை நடத்தி வருகின்றனர். சண்டை இன்னும் தொடர்கிறது.
காயமடைந்த பலர் கிளிநொச்சி மருத்துவமனையில் அனுமதிக்கப்பட்டுள்ளனர்.


இன்றுகாலை முகமாலையூடான சகல போக்குவத்தையும் தடைசெய்திருந்தது படைத்தரப்பு. அதைத்தொடர்ந்து இன்றுமாலை தமது பெருமெடுப்பிலான இராணுவ நகர்வைத் தொடங்கியது அரசபடை.
இதேவேளை யாழ்ப்பாணத்தில் பொதுமக்கள் கடுமையான பீதியில் தவிப்பதாகச் செய்திகள் வருகின்றன. குறிப்பாக தென்மராட்சிப் பகுதி மக்கள் இடம் பெயர்ந்துகொண்டிருக்கிறார்கள்.
யாழ்ப்பாணத்தில் கைத்தொலைபேசி இணைப்புக்களை இராணுவத்தினர் துண்டித்துள்ளதாகவும் தெரிவிக்கப்படுகிறது.

இதையும் மாவிலாற்றுடன் சம்பந்தப்படுத்தி அறிக்கை விடுவார்களோ என்னவோ? ஆனால் அப்படி அறிக்கைவிட்டாலும் கேட்டுத் தலையாட்டுவதற்கு உலகம் இருக்கிறது.

இன்னும் ஒப்பந்தம் நடைமுறையிலிருப்பதாகப் பசப்புவது கேலிக்கூத்து.
யுத்தநிறுத்த ஒப்பந்தத்தை அரசு முறித்துவிட்டது என்பதை வெளிப்படையாகச் சொல்லிவிட்டு நாட்டை விட்டு வெளியேற வேண்டியதுதான் நோர்வே செய்யவேண்டியது.
இன்னும் இவர்களுக்கு இங்கே என்ன வேலை என்று தெரியவில்லை.

இத்தோடு தென்மராட்சியில் படையினரின் ஆட்லறித்தளங்களுக்கு அண்மையில் இருக்கும் மக்களை ஒரு கிலோமீற்றர்களுக்கு அப்பால் இடம்பெயரும்படி புலிகளால் அறிவுறுத்தப்பட்டுள்ளது. இறுதிச் சமரான தீச்சுவாலை போல் அமையுமா? புலிகள் முன்னேறி நிலமீட்பைத் தொடங்குவார்களா? அல்லது அரசபடையின் கைஓங்குமா என்பது தெரியவில்லை. முதலில் ஒப்பந்தம் முறிக்கப்பட்டு புலிகளின் கைக்கட்டு அவிழ்க்கப்பட வேண்டும்.

Saturday, August 05, 2006

திருமலையில் சண்டை முடிந்தது. தளம்திருப்பினர் புலிகள்

தேர்ந்தெடுத்த இலக்குகளை தாக்கியழித்த புலிகள் பழைய நிலைகளுக்கு திரும்பினர்.

திருமலையில் கடந்த 26 நாள் தொடக்கம் விடுதலைப் புலிகளின் நிர்வாகப் பகுதிகள் நோக்கி சிறீலங்காப் படையினர் விமானத்தாக்குதல், எறிகணைத் தாக்குதலை கண்மூடித்தனமாக நடத்தினர்.

இதனையடுத்து மாவிலாறு அணைக்கட்டை சிறீலங்கா படையினர் கைப்பற்றும் நோக்குடன் முன்னெடுத்த படைநகர்வு விடுதலைப் புலிகளால் முறியடிக்கப்பட்டு விடுதலைப் புலிகளால் தேர்ந்தெடுக்கப்பட்ட இலக்குகளை அழி்க்க அதாவது இராணுவ நடவடிக்கையை மேற்கொள்ள பின்தளமாக இருந்த படைமுகாம்கள் தாக்கியழிக்கும் படைநகர்வை விடுதலைப் புலிகள் மேற்கொண்டனர்.

இதன் அடிப்படையில் மூதூர் பிரதேசத்திலும், சேருநுவரப் பிரதேசத்திலும் தேர்ந்தெடுக்கப்பட்ட இலக்குகளை தாக்கியழித்த விடுதலைப் புலிகள் தமது மட்டுப்படுத்தப்பட்ட படைநகர்வை நிறைவு செய்துகொண்டு புரிந்துணர்வு உடன்படிக்கையின் அடிப்படையிலான வரையறுக்கப்பட்ட பழைய நிலைகளுக்கு நேற்றிரவு திரும்பியுள்ளனர்.

தற்பொழுது ஏற்பட்டு மனிதாபிமான அடிப்படையிலும் தேர்ந்தெடுக்கப்பட்ட இலக்குகள் தாக்கியழிக்கப் பட்டதையடுத்தும் விடுதலைப் புலிகளின் தாக்குதல்கள் முற்றுமுழுதாக நிறுத்தி பழைய நிலைகளுக்குத் திரும்பியுள்ளனர்.

இப்படை நடவடிக்கையில் சிறீலங்கா அரச படையினர் தரப்பில் 100 மேற்பட்ட படையினர் கொல்லப்பட்டுள்ளனர்.

விடுதலைப் புலிகள் தரப்பில் 30 போராளிகள் வீரச்சாவடைந்துள்ளதாக விடுதலைப் புலிகள் வட்டாரங்கள் தகவல் வெளியிட்டுள்ளன.

நன்றி: பதிவு.
______________________________
சண்டை தொடங்கியதைப் பதிவாக்கியதால் பின்வாங்கியதையும் பதிவாக்க வேண்டும்.

திருகோணமலை மீட்பு நடவடிக்கையென்றும் இன்னபிற சொற்களாலும் இந்நடவடிக்கையை வர்ணித்து, புலிகள் நிலமீட்பைத் தொடங்கிவிட்டார்கள் என்று வலைப்பதிவுகளில் கூத்தாடியவர்கள், பாடல்கள் ஒலிபரப்பியவர்கள், பின்னூட்டங்கள் போட்டவர்கள் எல்லோரும் என்னைப்போல் 'சண்டை முடித்துத் தளம் திருப்பிய' செய்தியையும் சொல்ல வேண்டுமென்று கேட்டுக்கொள்கிறேன்.

இறுதி யுத்தமென்று சிலர் சொல்லித் திரிந்தபோது, வைத்தார்களே ஆப்பு.